27‏/10‏/2009

someting creative .. !

بسم الله الرحمن الرحيم ..



my vision 
( قطر بأيدي قطـريـة


:
:



تكلمت في موضوع قديم ( عن قلة او بالاصح ندرة المدونات القطريـة ) ..
..
واليوم .. بتكلم عن ( اختفاء الشباب القطري من ساحـة الابداع !)

ادري ان هناك كثيــــر من شبابنا متميز وعنده قدرة على التطوير والابداع بشكل كبير .. بس وينهم !!

ليش مختفيين .. ؟

الدولة عندنا تستعيين بخبرات شبابيه خارجيـه ( وشبابنا قاعد! )

( اغلب الـ activities  .. من  الاجانب ..! ) ليش ليش ليش ؟؟؟


طيب اذا الدوله مااعطتهم الفرصه مع انه العكس ( اعتقد قطر من اكثـر الدول اللي تعين شبابها وتوفر له السبل ليتطور وينتج ويبدع  حتى في مجال العمل )

بس مع ذلك ماانشوف بصمـة واضحــه !

الكلام كثير .. وكثير اللي يتكلمون .. بس مانشوف ناتج !

مجموعة كبيره من الشباب اللي منضمين الى الجمعيات التطوعيه وغيرها .. بس اعتقد ان كل جهدهم منصب على مجموعة قليلة جدا ..


..

الاعلام .. وين الشباب القطري منه ؟؟  .. التلفزيون كله يمكن المذيعين القطريين المتمكنيين مايتعدوون الـ 5  ! 

والبرامج المبتكره او الجديده  ماتتعدا الـ 3 او 4 برامج  .. طيب ليش ..؟

برنامج شبابي وااحد فقط  اللي شفته  هو ( لكم القرار ) واعتقد هوكل شهر اذا مب انا غلطانه

البرامج الدينيه .. مانشوف الا ( الشيخ عايض القحطاني ) القطري الوحيد في هالمجـال .. مع ان شباب كثيرين فيهم الخيـر بس وين الفرصه لهم ! او بالاصح ليش مايحرصون انهم يتقدمون بهالخطوة ؟ 

الاذاعـة .. برامج اذاعة قطـر حلوة ( بلاش نظلم احد ) 
اذاعة القرآن الكريم ( من رأيي يبيلها شغل وتعب اكثـر ) << بس هذا مايعني ان مافيها برامج حلوة .. فيها ومن ابرزها .. كيف اصبحت 



غير المجال الاعلامي .. مع اني اشووف انه مهم جدا

مجال الانترنت ؟؟ .. وين شباب قطر منه ؟ 
مدونات .. مافيه الا نادرا
منتديات..  قليل اللي نشوفه منها  ناجح ومفيد .. 
حاولت ابحث عن قروبات قطرية متميزة بالفيس بوك  مالقيت ..
التصوير والفلكرات <<< كثييييييييييييييييييييييييير والكل منصب هنااك !

اتمنى القى الشباب القطري في موضوعي هذا واسمع ارائهم ..

واسمحولي على الاطاله :)

دمتم بكل الخيــر ..




11 COMMENT.s:

بدون تعليق يقول...

الابداع موجود .. لكن الانسان المبدع ياسكرابل شخص ذو مشاعر حساسة ..

من سنين (ايام العزوبية ^_^ ) كنت مشترك في احد المراكز الفنية .. وكان المركز يقدم دورات ويشجع الشباب .. اشوي اشوي صار المركز وبسبب وجود فنانين حقيقية مش مجرد مدرسين .. صار من احسن الاماكن في قطر جذبا للمواهب الحقيقية .. فعلا بدون مبالغة كان فيه فنانين على مستوى .. بعد فترة تغيرت سياسة المركز بطريقة عجيبة وصاروا ماديين .. وصار التطفيش مادري ليش ولا اعرف اللي خلف الكواليس بس يمكن ان في مواهب بدت تطلع على مستوى قطر .. وتنافس اللي كانوا يديرون المركز .. وشردوا الشباب وصار مهجور وصار اللي فيه كله يهال ..

بس تعبت كتبت وايد :^

بدون تعليق يقول...

المبدع يبغي رعاية .. يبغي اهتمام .. على الاقل يهتمون في المبدعين مثل مايهتمون بالرياضة .. ياسكرابل الحين في بلادنا خلهم يهتمون في المواطن بعدين قولي اهتموا بالمبدعين .. صرنا اقلية للاسف ..

سمو الأميرهـ ..ツ يقول...

((انا بس رزة)) ..

اممم فعلاً اللي لاحظته وجود الشباب الكويتي وبقوة في ساحة التدوين ((ما شاء الله عليهم ))

ونادراً نلقى شباب من قطر ..
ومن الامارات بعد ..ينعدون ع الأصاابع
لازم أرز ويهي فكل بوست تحطينه :d


:)

بدون تعليق يقول...

صادقة سمو الاميرة الكويتين شباب وبنات الافضل بالتدوين .. شباب قطر داقين مايبينون .. مختفيييين ..

كتابات الكويتييين غير شكل .. ليش مادري !!! ليش هم عندهم قدرة على التعبير اكثر مننا !! بعد مادري ..

عبدالعزيز من مسك يقول...

الابداع شكله شكل اي شئ في الحياه بدون دعم او عطاء او ثناء يموت هذا الابداع حتى مع واكرر حتى مع الثناء الميت
من مسيرتي في الحياه في قطر وانا قطري اقول وانا اتحمل مسؤوليه كلامي المبدع يحارب من الجاهلين في قطر على مستوى العمل او الوظيفه او حتى على المستوى الشخصي لسطحيه التفكير عن القالبيه العظمى
ولكن الابداع طعم اخر , انا شخصيا لا اعترف بإبدع ممهد له الطريق لذه النجاح في الابداع تكمن في التغلب على الصعوبات , وضح جليا لنا في قطر للاسف الي يشتغل ينحذف في البيت والحرامي يترقى والمنافق يشكر !! هذا حال واقعنا ولكن هل نستسلم , لا اقولها وبأعلى صوتي ..

تقف في مسرة حياتنا امور كثيره سلبيه كل ماعلينا هو النظره الايجابيه والتفكير بعمق لجعل حياتنا افضل
دائما ومازالت وكنت اقول قطر ارض خصبه للابداع
العيون كثيره
المواردقليله
الدعم مختفي الا للمجال الرياضي او التافهه

طبعا ما ألوم الاعلام لان القاطره تتحدث بلغه غير لغه الشعب وهي لغات عربيه مختلفه يرأسها انسان يدير الجريده او التلفزيون من ناحيه ماديه لا اكثر ولا اقل

الخوف من مقص الرقيب ومن المسائله يجعل احلام كثر من الاعلاميين ينتقل لقسم العلاقات العامه لانه اجمل في السفرات والطلعات والاكثر ربحيه

صعوبه الحياه وغلاء المعيشه اسباب حولت تفكير المبدعين من الابداع للعيش بالمستوى البسيط من متطلبات الحياه
ولهم الحق في ذلك

ومع كل ذلك لابد لظلمه الليل ان تبرز انواع مختلفه من النجوم وهم مبدعين حياتنا الحاليه

في كل وقت وزمان هنالك رجال و نساء
يفعلون امور خارجه عن المألوف لا تفهم ولكن اجيال بعدهم تفسرهم وتقيمم اعمالهم ...هذا درب المبدعين

الابداع موجود في كل وقت وكل زمان
موجود في قطر وغير قطر ولله الحمد والمنه

ولكن كما ذكرت سابقا عوامل كثيره تتحكم فينا
ولكن متعه الانجاز فعلا ان نصل رقم الصعوبات
اعتقد اجمل مثال لذلك اخذ صوره لشباب قطر قديما وشباب قطر في هذا العصر ستجدونهم محافظين على عادات وتقاليدهم ودينهم
أليس هذا ابداع رغم ظروف الحياه والعولمه والحروب والانفتاح .... انه ابداع وصمود صدقوني

لنقلب النفجان ونرى الايجاب ونكون حجر اساس يداس لخطوات الابداع

jonoon 3aqel يقول...

الموضوع له عدة جوانب..

الخلل من ناحية الدولة:
انها احيانا تثق في الخارج..و لا تعطي شباب البلد فرصة..مثال على ذلك التصوير..هناك ابداعات قطرية في التصوير الضوئي..يكفيهم فقط اظهار اسمهم بعد نتاج عمل يعملونه..و ربما تقدير مادي يسعدهم و يثبت لهم أن ما يفعلونه له قيمة....و الحاصل ماذا؟ اذا ارادوا صنع كاتالوج لشئ ما..جابوا مصور من الخارج..و اصرفوا عليه اللي ما يحلم يلقاه في بلده..و فوق هذا بعد مكافئة مادية..نصفها فقط..يسعد المبدع القطري لو حصل عليه كشكر لمجهود بذله..

الدولة موفرة أماكن للابداع برأيي..لكن المشكلة تكمن في من يديير هذه المراكز..أحيانا يكونون متحيزين ضد القطريين..أحيانا لا تتوافر عندهم امكانية الجذب أو التجديد..و أحيانا يتحول الهدف من خدمة الابداع..إلى الربح ماديا!! طبعا هناك مراكز سلمت من هذه الاشياء..على فكره..في مراكز وايد..
النادري العلمي..نادي الفروسية..مركز شباب الدوحة..المراكز اللي جنب المول للتصوير و الخط و الحرف اليدوية..الرماية..الخ..كل هالاماكن تقدم دورات..بس يبي أحد يروح و يسأل..و يستغل الموجود لتنمية مهاراته..

الدولة مقصره في البحث..مثلا مافي مسابقات تقام على مستوى الدولة تحث الشباب و الشابات على الابداع..ف المبدع يظل مكانه..يا أنه يبرز نفسه بشتى الطرق..أو ما احد راح يكتشفه..

الخلل من الشباب ايضا:
الهواية...أعتقد هذه ثقافة تنقصنا..طبعا لا استثني نفسي...الكثير من الشباب لا يعرف ما هوايته لينميها.. الوقت ف قطر يقسم بين (لو راح اتكلم عن الشباب) مجالس..حداق و بحر..قنص و بر..قهاوي و سهر.. طبعا هذا البعض و ليس الكل..

العيب\ الحياء\ و لا مب شي قدام الناس:
انتي ذكرتي الاعلام...المعظم يخجل من الظهور امام الكاميرا..لهذا يلجأ الى الاعداد و الانتاج و ما الى ذلك..هذا لو تكلمنا عن الاعلام..
هناك ايضا نظرة الناس (اعتقد..صححوا لي لو كنت أتخيل) للشخص اللي يشتغل على حاله...ما ادري...أحسهم ينظرون له نظرة ال"مب صاحي" و اللي قاعد يشتغل على شي ماراح (يستغله)..او انه قاعد يسوي شي ما اعتادوا عليه الناس فيكفي هذا السبب ليكون غريب..

التثبيط:
هذه مشكله ايضا ..التشجيع جدا مهما لرفع الخجل..ليخفف من وطأة الحدث اذا حصل خطأ..ليصبر على الطريق الطويل..
لما درا احد اصدقائي اني اكتب خواطر..قعد يضحك و يقول "شنو يعني خواطر!!" ..هي ما كانت عاجبته..و من حقه..في ناس ما يعجبهم الشعر مثلا..او ما يصبرون على رواية يقرونها..لكن المفروض ان ما نستهزأ او نقلل من هذا الشي..
و هذا سبب يخلي من سابع المستحيلات اني اعطي اسم مدونتي لأي أحد اعرفه وجه بوجه..

أنا حاس اني تكلمت وايد..
هذا اللي جا في بالي حاليا..
اي..عن التدوين..الكثييير ما يعرفون هالعالم أصلا..

بسوي ببلش للبوست..و اذا في اي اضافة بزيدها ان شاءالله

فكره جميلة و موضوع مهم..جزاك المولى خير الجزاء..
:)

تحياتي

L!fe يقول...

السلام عليكم ..

اول شي ييتكم من الكويت جنكم تتكلمون عنا هاا
يالله كبسه رفعوا ايدكم :) .. ( اتغشمر معاكم )
احنا كلنا عيال عم اطبق مقولة خليجنا واحد وشعبنا واحد ..

حبيبتي انا اللي اشوفه في قطر او الكويت او الدول الخليجيه ويمكن العربيه للاسف في البعض ماكو ثقه بقدرات
شباب البلد انا من الناس اللي احرص عن الانتاج المحلي
باي مجال كان ( طبعا في المجالات اللي ماتغضب ربي )...

بالعكس ان اشوفه يبدع ويتقن الشغل يعمل باخلاص لان
مثل ما يقولون دهنا في مكبتنا اللي بسويه بينصب لي
ولاهلي ولديرتي .. ياريت ياريت لو المسؤولين عندنا شوي بس يرفعون من روح شباب المعنويه وبتشوفون روح المنافسه الشريفه شلون والابداع شلون صاير ..

وانا على ثقه ..
بانهم قادمون وبقوه ..


تقبلي احترامي ..

●• ۈحيدة بليآهُم•● يقول...

كــل شخــص لـه موهبــة ...
ويبيلـه تشجيــع ..

من قبــل الكــل ..من الدولة ..ومن الناس..

انا أعرف نــاس عندهم موااهـب..
وكتاباتهم رائعة ..بس انهم يكتبوون بدافترهم ..

ولـو الدولــة اتشجعــهم بيظهروون .كثاار ما ينعدوون ..

وتسلمين يالغالــية ..
ودمتي بود

S.M.G يقول...

صراحة لا تعليق المفترض سؤالك يكون
أين هم من يحتضنون مواهبنا ؟
لأنه هناك الكصير من المبدعين لكن سيطر عليهم الخوف من عدم نشرها للعام ^^
أشكرك على الموضوع ،، تقبل مروري

janah يقول...

جزاكِ الله خييير اختي
موضوعك مهم وانا كقطريه يوجد مبدعين ولكن
لايوجد اهتمام كبير فيهم الا من رحم ربي
وللاسف قد يكون الاهتمام لمبدعين في مجالات سخيفه
مافيها اي فائده فاصحاب الافكار الهادفه والنافعه قله
وخلينا تنكلم في مجال التدوين بسبب دخولي هالمجال
في مبدعين متميزين في كل المجالات لكن خسااااره في مجالات تافهه الحمدلله الله عطاهم نعمه كبيره لكن استعملوها في مايغضب الله والعكس صحيح في مدونات تشرح الصدر ومنها مدونتك لكن قليله

اسأل الله ان يزيد المدونات الهادفه اللي تحتوي على النافع والمفيد

أسعد االله قلبكِ وأسفه على الاطاله

وهذه عنوان مدونتي وسبيسي

http://happyway0.blogspot.com
http://nooorway.spaces.live.com

اتمنى تشرفينا بزيارتك : )

لشقردي يقول...

يمكن لامستي هم الكثيرين من الشباب القطري


وهمهم منهم وفيهم


الغريب ماله يد بالموضوع


مشكلتنا الاساسية نحارب بعضنا البعض



الابداعات القطرية موجودة


ومتميزة وفي كافة المجالات


لكن من يظهر هذه الابداعات ومن يدعمها


ينقهر الواحد لين سمع عن سمفونية يصرف عليها بالملايين


ملحنها واحد اجنبي ويقول هذي سمفونية لقطر



معقولة ملايين على لحن


تتخيلون لو قطري هو الملحن كم بياخذ




ولو بنضرب الامثلة نشوف مثلا منتخب العاب القوى لما كان افضل منتخب خليجي بفضل عيال قطر



ايش كانت مكافآتهم


الحين المنتخب كله مجنسين من افريقيا

ولا انجاز تحقق لقطر على يدهم الا القليل طبعا



لكن نرجع ونحسب كم تنفق عليهم الدولة



الملايين طبعا هالصرف من غير المكافآت لانهم ا حققوا شي يستاهلون عليه مكافآت


نرجع للكتاب القطريين


كم كاتب لقى دعم من الدولة لاصدار الكتب والمطبوعات



كم كتاب يصدر من قطر سنويا للكتاب


كم مبدع قطري في مجال الخطابة والالقاء



من صغرنا نتابع افضل الخطب من الكويت فقط



يعني ايش اللي يختلفون فيه عنا



الاختلاف واضح



هو طرق التدريس والتربية



تلعمنا من الصغر على الحفظ وبس

احفظ لا تناقش الاستاذ


زين وين بيتعلم الواحد يتكلم ويلقي كلمة


حتى طابور الصباح لازم من ورقة



كم عدد المذيعين القطريين الناجحين


ترى معظمهم كان من فترات سابقة


والحين مجرد اشكال لكن من غير ثقافة


حتى برنامج عايض القحطاني تقليدي ولا تجديد فيه


ومواضيع البرامج محدودة لا يمكن ان تبتعد عن خط واحد ثابت



ليش يحق لنبيل العوضي ومحمد العوضي في الكويت التحدث بكل شي واحنه نخاف



ويطلع قرار من اعلى سلطة


بايقاف برنامج لعقيل الجناحي في رمضان


وهو يجمع التبرعات لصندوق الزكاة


ويبعد بقرار لا نقاش فيه


وين تبغون الواحد يبدع



ويقدم اللي عنده


وين عبدالعزيز محمد المذيع المعروف

النماذج الواضحة والبارزة لما تطوى تحطم كل آمال الابداع لدى البقية



بتفتح منتدى ولا مدونة كم عدد زوارك واعضاءك الحقيقيين



متى كانت المدونات ولا المقالات ولا الكتابات


لها تأثير على الراي العام ولا عند المسؤولين


متى تعطى للاراء المختلفة حقها في التعبير والمشاركة في اتخاذ القرار



وللحديث بقية


والسلام عليكم ورحمة الله وبركاته

إرسال تعليق

 
Blog Template by Delicious Design Studio