بئر بترول يمشي على الارض!!!

بسم الله الرحمن الرحيم 

قطري /خليجي = بئر بترول يمشي على الارض .. 

هذه القاعده عند كثيريين من العرب المقيمين  في دول الخليج ..

للأسف ..

لااشمل الكل طبعا .. 

ان طلع هالموضوع من الاجانب ماراح استغرب .. لانهم جايين الخليج بهدف واحد وهو جمع المال الكثير !! بإختصاار .. 

عربية تقول .. ابدا لايوجد قطري فقير !!

واخرى تقول .. القطري حتى اذا لم يكن لديه عمل يمكتلك مالا كثيرا ورثه من والده !! 

والله خساره ان هالفئه افتحت قطر والخليج لهم انهم يجون ويستقرون عندنا .. 

اخذوا الفرص اكثر من المواطنين ..

اركبوا سيارات مايحلم المواطن البسيط بركوبها .. 

مايلبسون الا الماركات ..

عاشوا عيشه مايحلمون في بلادهم ان يحصلونها .. 

وبعد مب عاجبهم .. 

سؤال .. يعني بكلمة مافي قطري او خليجي فقير .. 

وتقولونها بحقد 

شنو يعني ناويين تاخذون كل مستحقات المواطن !! 

مافي قطري فقير .. 

حسافه والله .. ان اللقمه تنزل لكم وبعض المواطنين حالتهم حاله 

يالله يوفرون لقمة يومهم .. 

وانتوا ماكلينها بارده مبرده .. 

وغيرهم لين تجنسوا .. صاروا كأنهم مالكين البلاد .. 

اكيد مااشمل الكل .. 

بس في فئه اقصدها ولازم يتوقفون عند حدهم .. 

.

 

via mr.mtwa3 

^____^

المراكز الصحيه !!

المراكز الصحـيـة .. 

عندي قناعه شخصيه مااقدر اغيرهـا ان هالمراكز مجرد اسم  ومالهم اي صلة بالصحـة ولا الطب ولا التمريض ولا غيره .. مجرد حشو .. 

كل مرة اتمسك بقناعتي اكثر واكثر .. 

مااقتنع اني اروح لهم ابداا لو كنت تعبـــــااانه وهلكانه ومافيني ضلع صاحي مااقتنع بكلامهم .. ! 

بس مرات الواحد يضطر ان يروح لهم .. واذا راح اشوف يزيدونه تعب ومرض بدل ما يعالجونه  .. 

تدخـل على الدكتور/ة .. تلاقيه نفسه في خشمه وماله خاطر يسوي شي ..

حتى مايكلف نفسه يبتسم كأنه احد غاصبه على هالوظيفه والناس اللي تدخل عليها مافيها الا الدلع 

ومايمديك تتكلم وتشرح حالتك هز راسه انه فهم شنو فيك وبدا يكتب الوصفه ! .. شالموضع ليش وكيف مب مهم المهم يله رووح والمريض اللي بعدووه ..! 
اقترح .. بدل من تواجد دكاترة تخصص طب عام ( كحه وبنادول) .. ان يتواجد في كل مركز متخصصين 

:

:

اذكر مره اضطريت اروح للمركز الصحي وكان عندي ضرس العقــل ( يعني العقل كله يرووح وقتها من قوة الالم ) دخلت شفت دكتورة .. قالت لي شفيج ! قلت لها ضرسي يعورني << يعني بالله يايه مشاهده ويهج على اي اسااس !! ..

قالت لي يعني شنو فيج بالضبط << ارفعت ضغطي شوي بس مسكت نفسي .. 

وانا الالم بيطلع من عيووني .. 

قلت لها قبل اسبوع جيت وقال لي الدكتور اني اخذ مضاد لانه ملتهب وبعدين تبتدي عملية الخلع ..

قالت لي اي دكتور هو مش كاتب شي في الملف (( طبعا بصوت متنرفز تكلمني ))

قلت وانا اشدخلني انه ماكتب شي في الملف .. قالت والمطلوب .. 

وقتهــا خلاااص حسيت اني بذبحهــا .. هنيه عليت صووتي وقلت لها شلووون شالمطلوب وووو ...

قالت لي طيب انتي تعلين صوتج ليش ! .. قلت لها ابد انتي احترمتي المريض من البدايه وتكلمتي بهدوء وبادرتي بعلاجـه ! .. 

وبعدها قالت مااقدر امسك ضرس العقل وعطتني تحويـل :s 

وبعدها على طـوووول خاااص والله مامنهم فاااايده هالمراكز الصحيه الا في الكشف الطبي لتسجيل المدارس ><" .. 

وغيرها من المواقف اللي يعطيك علاج وبعدها يطلع غلط واللي مايدري شنو فيك اساسا ووو ..

:

:

والله يعــيـــن .. 

 

 

سنكون أكثر سعادة حين نكون أكثر براءة وعفوية في التعبير عن مشاعرنا، لأنفسنا، ولمن حولنا، ولمن نعرف، ولمن لا نعرف:التعبير عن المشاعر ليس بوحاً بأسرار نووية !سنكون أكثر سعادة حين نتخلى عن كبريائنا وتعاظمنا, ونتواضع ونستمع إلى حديث النفس واحتجاجها على تجاهلنا لضرورتها ومتطلباتها!

د.سلمـان العـودة .. 

... 

مقاطع اعجبتني من نشيدة تؤمـل لمحمد العمري (تسجيـل جديد ) ..

لتحميل المقطع (1) لتحميل المقطع (2) لتحميل المقطع (3) .. 

ليس من غير المنطقي أن أفضل دمار العالم بأسره على أن يجرح إصبعي....ديفيد هيوم

الأنــانيــة ..مامعناها و مامقدارها عندك.. !  .. 

:

: 

شــــ غ ــــب

:

:

 *إضاءة ~

يا ابن آدم إنك تغدو وتروح في طلب الأرباح،
فليكن همك نفسك فإنك لن تربح مثلها أبدا

الحسن البصري

..

فلتفرح جمعية حقوق الرفق بالحيوان !

منو الذكي اللي يعرف ماهذا الشيء ! .. 

إنــه حوض لتربيـة النمـل ! .. ( انا من اشوفه تصيدني حكه >< ) 

تعليمات الاستخدام .. 

تضع 25 نمله من صنف واحد << ان تقوم بجمعهم  بنفسك !

ويجب عدم اضافة اي نوع مختلف 

 عدم اضافة اي مادة غذائية

 درجـة الحرارة طبيعيه لا منخفضة ولا مرتفعه 

عدم اطالة النظر اليهم <<< لانهم خجولين جدا >> من عندي خخ

اول 18 ساعه لاتستغرب عدم ممارستهم اي نوع من الانشطه << لان البيئه جديده عليهم ويلزمهم التعود ..  

واذا لم تتمكن من الحصول على 25 نمله من صنف واحد بإمكانك طلبهم من خلال العنوان التالي ( ... ) << الكتيب ضاع يعني ماعرف العنوان 

>>> هذا ينافس قمـل نعيرية  اللي صارت موضه انهم يبيعونه في الصالونات لانه يطول ويغلظ الشعر !!!!!  ووووووع

للعلم * يوجد منظار لمراقبتهم والاستمتاع بمغامراتهم 

^^"

عذراً لرداءة الصوره :)

وجوه مختلفة ~ ..

هو ذكي جدا 

مثقف جدا 

يعرف الكثير عن الكثير ..

لكنه لايعجبه حال  الكثيـر 

ولا يرغب في مخالطة الكثير 

اكتفى بإنتقاد الكثيـر 

فإنه لا يعجبـه الكثيـر ! .. 

:

:

هي محظوظة جدا 

حصلت على الكثيـر 

لكن عقدتها بإنها أقـل من البقيه ملازمـة لهـا 

فأخذت تبث سموم عقدتها بين من عرفتهم 

فمن شعرت بالغيره منه , أبت الا ان تذيقه الأمرّين ! .. 

:

:

هو طيب جدا

خدوم جدا 

محبوب جدا 

فقط عندمـا يكون خارج محيط اهلـه! .. 

:

:

هي أرادت وجه  الكمـال 

سعت له مساعي كثيـره 

اجتهدت واجتهدت واجتهدت 

لكن تناست ان هناك امورا صغيـره اهم بكثـيـر من تلك الاهداف الكبيره ! .. 

...

قمــة الألم ..!

تخيلوا الصورة هي صورة " امرأة واقفه على رجـل وحده  وعروق يدها تقطر دم " يعني مجروحـه " ورافعه وجهها للاعلى وادموعها اربع اربع "  

تخـــيـــلتوااا !!

:

:

انزين وتخيلوا بعد ..

اني كاتبه خــاطره تحت الصوره

تصف قمة الالم الناتجه من عذاب الحب والمتسلله الى الشريان والعروق وتأثرت بها خفقات القلب !! ..

:

:

بس خلاص  وقفوا التخيل الى هنا ..

شنو بتكون ردة فعلكم ان دخلتوا مدونتي وشفتوا موضوع من هالنوع ^^"

:

:
رأيي الشخصي 

 خواطر كثيره من هالنوع لااعلم شنو مصدر الهاام كاتبها وكيف يتوجه لهالنوع من الكتابه المبالغ فيها ! 

واحيانا كثيره تكون امرأة , لااعرف كيف لاتخجل من عرض مثل هذه الخواطر  للاسف ..

لااقصد هنا المبدعين بالعكس في خواطـر قمـة في الروعه والوصف اللي فيها لايدل الا على ابدااع صاحبهاا , ويشد الواحد انه يقرى ..

:

:

بس االبعض بالغ في وصفه لااعرف هي مشاعر مكبوته الى هذا الحد ام ماذا .؟

وهل ينتظر اراء الاخرين في مشاعره المتفجره هذه ام ماذا ؟

:

:

شو راايكم  !

اني انزعج ><"
احدى المدارس المستقله
مادري من مسجل رقمي عندهم
وكل شي يصيير في المدرسه ادري فيه بمسجاااتهم
وكل مسج يتكرر اربع مراات
اتصلت فيهم عشان يمسحون رقمي بس مافي امل احد يرد
صج صج ازعاااااج

صباحكم خيــر و نويـر ..

انشغلت بالنظام الجديد وانصب تركيزي عليه ونسيت المدونة كم يوم

:

:

ماعندي شي في هالبوست بس اصبّح على اللي يمروون علينا كل يوم واتأسف لهم على تأخري في البوستات :) ..

:

:

انشودة (( شراب الحب ))  للمبدع .. حمود الخضـر ..

شراب الحب يعرف بالمذاق
وما كل السقاة له بساق
أحب الله عن أدبٍ وصدق
ولا أرضى سوى التقوى خلاقي

إذا ما عشت لا أنسى
إلهى به أسمو من الأخرى المراق
يعز علي ترك الحب عندي
ولو بلغت الروح التراقي
تركت جميع خلق الله دوني
شُغلت عن الخلائق باشتياق

ومن عرف المحبة عن يقينٍ
حرامٌ أن يميل إلى فراق
وكيف أحب غير الله يومًا
وليس سواه في الاكوان باقي

:

:

قصيدة لولاك  .. للعفاسي .. (كلمات رائعه ) 
:


لعبة ترفع الضغط 
><" 
LINK 
I found it in offline blog

enjoy it ^^"

:

الله يفتح لكم ابواب رزقه والسعاده :)

صباح الخيــر

صبــاح الخيــر

:

:

مقاطع من برنامج كيف اصبحت

1.

والكاظمين الغيظ 

والكاظمين المحسنين لغيرهم
واعفوا فإن العفو افضل منطق
هذي سجايا المؤمنين فكن كما
ذكر المهيمن في الكتاب عن التقي 

2. 

نعيش بالصدق 

نعيش بالصدق والايمان اخوانا
والخير يزهو مع الإشراق جذلانا
فلنرسم الصبح نورا من حناجرنا
بصدقنا سوف يمضي السوء خسرانا 

3.

بر الوالدين
ببر الوالدين نعيش ازكى
ونشعر ان للحظات معنى
فأمك والحبيب ابوك كنز
من المولى ويوم الدين جنة
 

4.

اذكر الله 

اذكر الله ففي ذكر الاله
راحة البال وميناء النجاة
فله الحمد وسبحان الذي
لا يرد العبد ان قام رجاه

 

5.

القرآن

استفتح يومك بالقرآن

وتفكر في صنع الرحمن

خل كل اوهامك تتلاشى

نفسك تتقوى بالايمان

6.

الحب 

بالحب نبني هذي الدنيا
بالكره ندمر اوطان
يالله نملا هذا الكون  

حب واخلاص وايمان 

الروابط من مجالس اهل الكرم  

::

احد سمع عن انفلونزا الماعز !! 

Link 

ومازلنا ننتظر انفلونزا السمك !!
:s 

الله يحفظنا 

:

ودمتم بكل الخيـر 

 

كيف حــال الجميــع .. وكيف الايام العشـر معاكم ..

الله يرزقنـا الحج .. اللهم آميين ..

هالفتره بتمـر كذا مناسبه علينـا .. عيد الاضحى .. واليوم الوطني لـ " قطر العز " ..

كـل عام وانتوا بخيــر

وكل عام وقطر وشعب قطــر بخيــر

:

اذكركم  ونفسي .. صيـام يوم عرفه .. لاتفرطوون فيه ..

قال الرسول صلى الله عليه وسلم عندما سئل عن صيام يوم عرفة : يكفر السنة الماضية والسنة القابلة) رواه مسلم

 للمزيد عن فضـل يوم عرفه 

: 

في بالي وايد اشياء ابغي اسويهـا واحس الافكار متزاحمه كثيـر عندي .. ومااقدر اسوي منها شي .. لذلك سأتوقف عن طرح اي موضوع الى مابعد عيد الاضحى ان شاءلله .. لعل وعسى اقدر ارتب نفسي من جديد .. 

:

كلمـة لزوار مدونتي .. اشكر لكم تواجدكم الدائم الذي يعني لي الكثيـر .. 

ودي اذكر اسمـاء بس اخاف اذكر اسم ويسقط اسم سهوا .. 

:

و ألقاكم على خيــر .. 

صبـاح الخيــر ..

شر البلية مايضحك !!
حتى كلامهم اخترب !!! 

( اكرمكم الله عن هالفئة ) ..

لكن للاسف كثيييير من الشباب الحين من هالنوعيه ..

وكثيـــر من البنات اللي انسلب منها ( الحياء) ..

اللهم عافنا واحفظنا ..

واللهم واهدي شباب وبنات المسلمين جميعــا ..

:

:

 

احس بفتوووور

..ابغي استعيد نشاطي ..

( اظن اني احتاج اني اغيـــر جو .. بس الكل مشغـوول .. وانا ابغي اساافر >_> )

:

مممممممم .. 

( نصيحه تقدمونها لصاحبة المدونة << يعني انـا ) 

:

:

وصباحكم  خيـــر 

لغتي العربيـه

مااجمـل العربيـة ..
فصحى كانت او عاميــة
لااعرف هل هو تطـور او ستايـل جديد محبب لدى الكثييريين .. !ا

  (اقصد اللي يكتبون الكلمـات العربيـة بالحروف الانجليزيـة )

  ( مجرد رأي اتمنى ان تشاركوني رأيكم ) 

طيـور الجنـة ><"

:





أزمـــة طيووور الجنـــة
يقولووون في اعلاناتهم شاشـة كل الاسره
( غصب عنا مب برضانا  متابعيينهم )ا
مايسوى علينـا ليل نهار نهار ليل





اسناني واوا
وتصير خدودي حمراا
بطه بطه شفناها
بابا تلفوون
ووووو الكثير الكثير
<< حافظتهم عدل خخ


الزامي في كل بيت الحين طيور الجنـة اصداءها  بقوة في زوايا البيت

اليــوم ..
فرقة طيور الجنــه
في قطـر
في سباير زوون

وهذي اختي الصغيره تحن من الصبح عشان تكون متواجده هناك
علمـا بأن من صحت من النوم الى الان
وشاشة التلفزيون ماتبدلت عن طيوور الجنــه
:(:(:(

:
:

اسردوا مأسييكم هنا اخواني خواتي
ترى حاسـه فييكم

BORING :|

pla pla pla pla pla pla ...
Zzzzzz

^
^
^

بس  مـــلل :|

Ignore !

يُقـال .. إن كـل الحكمة في التغافـل ! ا

swalef

بسم الله الرحمن الرحيم : : المدونـه .. شنو هي .. قريت كثير عنها .. : : انزين متى يطلق على صاحب المدونه مدون صح ؟ وشنو هدف المدونات الصح ؟ : : اممممم بالنسبة لي .. عمر مدونتي قصير وخضت تجربة التدوين من فترة قصيره مدونتي .. بعض التدوينات شخصيه وبعضها متنوعه اي شي اشوفه مفيد احب انقله لمدونتي عشان يستفيد منه غيري .. بختصـار مدونتي جدا بسيطـه .. مااشوف اني اقدر اكتب او احط مواضيع كبيره او ان تكون مواضيعي ذات مفردات خشنه ! او كبيره مثل مانشووف في بعض المدونات .. فهل يُطلق علي مدونه صح ؟ !! .. : : فـاصـل .. مثل ماوعدت اختي المتفائلة اني اعرض مدونة تفسير القرآن .. ( الله يجزيكم خير صبايا على جهودكم ف يالمدونـه والى الامـام =) ) ا مدونة تفسير القرآن الكريم : : بعد الفـاصــل .. من كم يوم وانا طالعه الصبح مع ابوي يوصلني دوامي كان مشغل الراديو على احدى قنوات الـ fm .. كان موضوعهم عن .. لو كانت حياتك روايـه ماهو العنواان الذي تختاره لهـا !! ا عجبني الموضوع فكــــرت شنو ممكن يكون عنوان قصة حياتي ؟ امممممممم .. ممكن اعنونها .. بـ تشتت وسط الثبوت ! ا ( كل واحد يقوول شنو عنوان قصته ) ا >> اجباري : : هواااياتي .. هالقضية الصعبـه جدااا بالنسبه لي مااحب احد يسألني شنو هواياتي >>>> اصلا شنو هو هويااتي ؟ ا ما اعرف بس اشوف نفسي احب اشياء كثييره احب اجرب كل شي واحب اني اتقن كل شي تجذبني التكنولوجيا وايد احب التصميم >> مع اني مب ذاك الزوود بس احاول احب علم النفس .. امممم بعد شنو احب .. خواطر !! اكتب بس مره وحده وتنتين بس اللي نشرتها مااحب احد يقراهم غيري اطبخ !! والله احب بس على حسب المزاج الرياضه >> والله احبها كنت رياضيه بس الحين وقفت >> كبرنا وين فينا حيـل :d وبعد شنو .. اقرى ..؟ اممم احب اقرى بس بعد مب اي وقت كتب دينيه كتب تطوير الذات>>> مب اي كتب رواياات >> لأ مااحبها الا ماندر قريت مرة رواية بؤس وعجبتني ورواية لاتسخروا مني >>اعتقد جذيه اسمهـا صح منى ؟ منى اكثر وحده تشجعني على القراءة لاني كسووله في هالجانب ^^" بس المشكله في الـ cv شنو ممكن اكتب !!!! .. : : قبل لااسكت .. اضغطوا على الرابط فيه موضوع مواصفات الفايرفوكس من مدونة الطالب عشان تعرفون ليش اسوي دعاية حق الفايرفوكس ^^ اضغطوا هووون بس هذرت على راسكم واايد ^^ : : في امـان الله ..

التعبير مرة اخرى !!

افتقد التعبير مره اخرى .. ابغي ياتكلم اقول ارد مااقدر .. !ا اصلا انا من مشااكلي الازليه هي التعبير صعب جدا اني اعبر سواء كتابة او بالكلام لو يخترعون جهاز يترجم اللي احس فيه او ابغي اقوله بيكونون خذوا اجر فيني :"( .. رساله خـاصه جدا .. ان شاءلله اكون عن حسن ظنكم وكونوا كما عهدتكم حفظ الله لكم دينكم ووفقكم لما يحب ويرضى وييسر لكم كل خير برضاه عنكم .. امين .. وسأبقى كما عهدتموني بس اللي تغير ان عمري 24 ^^ .. :: ( محاولة للتعبير ) ا ملاحظه .. مااذكر اني خذت درجـة عدله في التعبير في اللغه العربيه ايام امدرسـه !!!ا ويمكن في الانترنت اقدر اعبر اكثر لاني استخدم الفيسات التعبيريه كثيير !!

ناس من بين الناس !

بسم الله الرحمن الرحيم ..

..



صفتين اكرههم
1.
أن يكون الشخص انااااااانــي ..
 


( هالنوعيـه مااقدر استحمـل اقعد معاها ..) ا
تلاقيها طول الوقت ماتتكلم او تبحث او تسأل الا في مصلحتها
امـا في غيير ذلك
تلاقيهم يغيروون السالفه ويقطعونها
لانها ببساطـه .. ماتخصهم !
يعني الي يقعد معاهم مطالب بنسيان كل شي الا مصلحـة من هو امامـه ! ا
..

2.


النوع الثاني
اللي تكون صفة الكذب ملااازمـه له بصفـه كبيره
حتى يكاد ان يصدق نفسه في كل مايكذب ! ا
كان الله بعونـه !! ا


..

بعد في نوعيه من الناس يحلييييلهم اول ماتعرفهم
بس يلقوون الا يبغوونه
ولاكأنك تعرفهم او قعدت معاهم


كلام في خاطري ..
مع اني كنت ناويـه ماانزل شي الا بعد كم يووم ترتاحون مني شوي
بس الكلام يقرقع في قلبي مااقدر اخليه ^^"

الراي راييكم

السلام عليكم ورحمـة الله وبركـاتـه ..

مافي بالي اي تدوينـة جديدة اضيفهـا ..

مع ذلك احس افكار وايد في بالي بس مب راضيه ولا فكرة تطلع

..

خل تكون هاذي التدوينـه عن افكاركم انتوا ورايكم ومقترحاتكم للمدونـه ..

..

شي حبيتوه في المدونـه
شي تتمنون تشوفونـه في المدونـه
شي ماتحبونـه في المدونـه
يعني رايكم مجملا عن مدونتي ..

واخذوا راحتكم  =) 
ابي سلبيـات المدونـه
ولامانع من ذكر الايجـابيـات لرفع معنوياتي ^.^

يله ابي اشووف ردوودكم ..

اذا ماعندكم مانع طبعــا